Ha doch nume wöue go z’Morge esse……..

Ja genau, das isch d’Idee gsi. Am Sunntig Morge, nach zwä super coole Herbstferie Wuche in Giverola, is Velodrome in Grenche go z’mörgele, u die letschte Stunde vom 24h Weltrekord im Bahnfahre vom Christoph Strasser mitzerlebe.

Währende mi Namensvetter us Östrich siner Rundeni träit, hei Role u ig zum zitvertrib dr Wettbewerb (Wiveu Pedal umdrehige het dr Christoph Strasser im RAM gmacht) usgfühlt. Dr erscht Pris „Garmin Vector 3“ wär das gsi wo mir druf gspanieflet hei… Es het für mi dr 3 Pris gä. Ä Startplatz ar Tortour Sprint 2018; knapp 400Km 4000hm. Ha ig mi gfreut? Ganz ehrlich, nid würklech bis is innerschte, aber äs isch für mi dr Wink mit äm Zaunpfahl gsi. Mit däm Pris ha ig ou grad d’Saison Ziel fürs 2018 i dä Häng ka. Herusforderig isch agnoh gsi.

Daheim has ig mau so chli analysiert. Mir di erschte Gedanke drüber gemacht, „wie schaff ig das blos? Hmmmm..  Trainingsplän usarbeite; wär sicher nid übu. Ernährigsberatig ou nid schlechtischte! Aber haute ig mi de würklech dra? Eher nid.“

Auso no einisch überdenke. Us erscht dr 10h Spinning Event in Schüpfe SIC, dä chunt grad glege, 10h Strample für di erschti Standortbestimmig.  Denn sicher im Frühlig zwe Wuche Giverola go di erschte guete u schöne Rad-Km abstrample. Mit äm grosse Ziel vor Auge geits düre Winter motiviert jedi Wuche eis bis zwöi mau uf Grenchen is Velodrome u o die x Spinning Stunde im Arena Fitness hei gwürkt.

Dr Frühling isch cho, mit Ihm zäme, ou scho di erschte lengerä Toure. Giverola isch wie immer ä  Bank für ä gueti Saison vorbereitig. Bi Bikeholiday ha ig no grad Pyrenäen Rundfahrt für ä Juni buechet. Acht Täg ca. 1’100Km 16’000hm isch genau di richitige herteprüefig. Pyrenäen Rundfahrt isch gelinde gseit Geniau gsi, ig chönt hie ä eigete Bricht derzue schribe.

Zrugg ir Schwiz hets vieli längi, strengi u extrem schöni Toure mit guete Fründe gäh. Sicher ä Houptprob isch di traditionelli Dietu’s 3 Pässetour gsi, mit 270Km u 4600hm bi sehr herte Bedingige hets no di richitgi Portion Selbstvertroue gäh.

So dr Tag X isch cho. Scho stah ig am Check-In vor 10 Jares Jubiläumsusgab vor Tortour. Ir IWC Arena gits für aui di Obligatorische Infos. Di letschte News zu de Streckine, Ablouf, Regle, u Sicherheitsrichtlinie. Mit grösstem Respekt lose ig de Infos zur 1’000km Tortour zue, „ungloublichi Leischitg vo au dene Athlete“. Nichts desto trotz isch für mi persönlich die 386km ä grossi Herusforderig u nid eifach ä Spazierfahrt.

Am Rheinfall isch dr Start zum Prolog 600m Sprint mit äm 200m länge 16% Ziel astieg. Churz u bündig isch Startzit für Tortour ermittlet 04:06 geits de für mi uf d’Strecki.

Mit dr Sandra Sutter, Susanne Keller u Sandra Kühni esse mir zäme no äs guets Znacht, u siniere drüber wie mir die Streckine wei agah u aues wei mitnäh. Im Hotel bereite ig aues zwäg, Akkle vom GPS iPhone u Lupine lade. Chleider zwäg lege……. Mit äm ischlafe isches nid ganz so eifach, mache mir jetzt doch no so Gedanke drüber wie ig das ganze söu agah u schaffis de überhoupt.

Churz vor de Drüe risst mi Metallica usem töifschlaf. Schneu go z’Morge esse, hie äs grosses Lob as Best Western Hotel Bahnhof, Sie kümmere sich super um die Tortourischte. Nach äm guete z’Morge no einisch ds Wetter checke u entsprechend Chleider u Sache is Trikot packe. Bi extrem Happy steits zum guete, perfekt zum Velofahren, gäge Abe lokali Gwitter, mit däm cha ig sehr guet läbe, zu däm Zytpunkt cha ig no nid ahne dass genau das Gwitter ä Ifluss uf mi Rennverlouf het.

Da Stah ig jetzt 04:06 uf dr Startbühni u werde uf das Rundstreckeli id Dunkuheit entlah.

Chli gspängschtig einsam geits dür Schaffhuse richitg Kreuzlingen. Usserhaub vo bewohntem Gebiet si d’Liechter vo de Mitbestritter im dunkle vor Nacht uszmache, speziells Gfühl. Mir gfaut di Nachtstimmig u gniesses dür Dunkuheit z’fahre. Dürs fählende Tagesliecht werd zfahre dür ganz ungerschiedlichi Sinne wahrgno. S’ Oug konzentriert sich vou ufä eiget Liechtchegu, wo mini Lupine vor mir ufä Asphlat wirft. Dr Wind uf dr Hut, d’Abrollgrüsch vo de Pneu si d’Indikatore wo eim d‘ rückkmeldige über Gschwindigkeit, Stigige oder Abfahrte gäbe. Da chunt mir zguet, da ig mi entschlosse ha mi vou u ganz uf mis Gfühli z’Konzentriere, weder uf ä Gschwindigkeitsmesser no uf äs angers Instrument z’luege. Ganz eifach mi i mim Wohlfühl-Rythums z’bewege. So isch mir ou entgangen, dass ig mis Garmin gar nid gstartet ha, somit ou keiner Date aufzeichnet. Dä Lapsus isch mir ersch nach 80Km ufgfaue. „Äs werd nid z’ letscht Missgeschick blibe.“

Am Bodesee entlang isch dr Morge langsam erwachet u het üs aui mit amen bluetorangrote Sunneufgang überem Bodesee härzlech begrüesst. Ä unvergessliche schöne Moment.

Dr Streckeabschnit dürs Rheintal isch für mi wie zugeschnitten gsi, ä absolute roller Teil. Dr Gägewind isch kei unbekannte Gägner gsi. „Ha das ar Costa Brava gnue chönne üebe.“
Schneuer aus erwartet het sich nach der erschte Timestation, vor mir dr Walesee präsentiert, mit Ihm zäme die erschti Gländ abwechslig i Form vom Ufstieg zum Kerenzerberg. Äs het grad chli guet ta de Rhythmuswechsu. Dr richtig Tritt zfinge isch nid grad sofort passiert, nach äs paar 100 Meter het sich aber ou das sehr guet agfühlt. Wens ufe geit, geits ou weder mau Abe, ä gfreuti Abfahrt richtig Glarus isch veu z’schneu vergange. Ou dert isch d’fahrt dür ä Ample ungerbroche worde, wo wie jedi angeri, Gfühlti 2000, mir mit dr’Farb Rot entgäge lüchtet.

In Glarus rechts wäg „mau nid richtig Gr. Scheidegg“ sondern zum Klöntalersee ufe, „äs isch würklech nid mini Stigig“. Miner Gedanke träie sich um di richitgi Dosierig vo dä Chräft, „nume nid z’schnäu, versueche s’optimale Verhäutnis zwüsche Kraftufwand u Schone zfinge“.

Mit extrem veu Freud toucht di sehnlichscht erwarteti zwöiti Timestation uf. Churz düreschnuffe, miner geliebte Biberli u zwe Becher Bouillon verdrücke, paar Riegle ipacke Fläsche mit Iso Getränk uffülle, u weder ab ufs Velo. Am herrleche  Klöntalersee entlang isches müglech d’Bei mit höcher Kandenz weder z’lockere, no ä Regu is Gsicht drücke u scho isch mä am Pragel Pass. Für mi persönlich eine vo de schönschte Päss überhoupt. Abwechsligsrich schlänglet sich die Strass id Höchi, mit zum Teil 18% Stigig isch ou hie weder z’Moto nume nid übertribe. D’heufti vor gsamte Tour isch zwar scho hinger eim, aber d’Höhemeter si no lang nid z’end. Uf dr Passhöchi erwartet d’Fahrer eine vo de viele Fotografe, wo die Tortour mit Bilder Dokumentiere. Merci daderfür dass Alphafoto.com eim ermüglecht die Erinnerige mit Fotos chönne z’teile. D’Abfahrt is Muotathal isch nid ganz sooo Flowig wie mä sich das würdi wünsche. Froh drüber, ohni Durchschlag oder schlimmers, wider ufäre aständige Teerstrass richtig Schwyz dörfe zfahre u äs geit sehr zügig vorwärts.

Vo Schwyz us geits richtig Goldau weder rechts weg ufä nach Sattel. Miner Bei meischtere dä Ufstig locker u ig bi rächt zuversichtlich uf das wo no chunt. Bis…. ja bis dr Verlauf vor Strecki ä abrupte wächsu macht.. Links Ufe geits, u mit Ufe meine ig würklech Oppsi, so zwüsche 16% u 12%. A däm Punkt wett ig miner Gedanke derzue, nid uf Papier bringe…. Aber sövu söu gseit si..“äs het veu Bärndütschi Chraftausdrück brucht.“ Nach au dene motivierende Wort u Selbstgespräch isches wie ir Trance richtig Zürisee, u kurz druf stah ig z’ Rapi im Stau. Realisiere z’späht dass miner Bidon meh oder weniger leer si. „Zum Glück si mir ja ir Schwiz da chunt ja au Steiwurf ä Brunne oder ä Lade“ Weit gefehlt, im Kanton St.Galle wärfe si di Steine offesichtlich mehreri km wit. Miner Gedanke dräie sich nume no ums flüssige Guet, „Äs Chünigrich für ä Brunne“ are Oase glich naht mini Rettig in Wald. Neu beflüglet isches ä klacks nach Bauma zur letschte Timestation. Mini Ungerschrift zur Bestätigung ufs Papier bracht.  Ä luschitge Schwaz mit dr Sandra wo ig a dere Steu ikouht ha, weder äs paar Biberli u no meh Orangeschnitz, „ig mah di Gels u Rigu nümme gseh“. Bis dahin si 300Km gschafft u jetzt no dr räscht.

Ab ufs Velo, äs geit Abwärts, auso dr Weg, aber leider mit Gägewind, „churz no mini persönlichi Meinig richitg Himmel über d’Situation kundta“, u I däm Momänt gseh ig die rabeschwarze Gwitterwueche hinger über mir. Wie erahnt, u ou vourusgseit schüttets nach wenige Minute wie us Chüble. S’ Regejäggli heuft zwar nümme gäge d’Nässi aber äs heuft immerhin chli z’wärme. Z’ Gwitter entlaht sich mit vouer Chraft, äs isch so Dunku, das ig soger us Sicherheitsgründ mis Liecht ischaute. Düre Gröipurege mit unvermindertem Tempo bouze ig über di Houptstrass. Vorus luege isch nid müglich, um d’Ouge zschütze isch dr Chopf mehrheitlich gsenkt. So hets de ou müesse cho. Ä Abzweigig verpasst. Tja paar Km witter isches de ou mir ufgfaue, dass dä Weg hie nid cha stimme. Zrugg zum Wegweiser, no einisch paar Chraftüsdrück i Rege usegrüeft; „aber dismau ganz klar gäge mi grichtet“. Muess zwar säuber lache über das Missgschik. Ha scho im Vorfeld immer gseit; „So wie ig mi kenne gits für mi meh Km aus für angeri“ Ja nu so isches äbe.

Mir geits immer no guet, kes lide, „ganz ehrlich erstunt drüber“. Mir tuet nüt würklech weh, weder Rügge, Schultere, Arme, usser z’Arsch gspüri chi, u di rechti Hand schlaft immer weder i. „Aber Hey, keis Thema.“ Bi richtig froh, aber ou verwundert drüber. Äs erscht mau luege ig so uf d’Date u Wärte vom Garmin, bi immer no mit 32-37kmh ungerwägs, natürlech nid im Durchnschintt, aber hei immer no im Wohlfühltempo wie am Afang nach 80km. Völlig überrascht über die Date.

Mini Lune isch unvermindert super, trotz am Rege. Bi mirs gwohnt, dank ar einte oder angere Rägetour im Vorfäud. Irgendwie geits plötzlich schnäu. Schaffhausener Stadtgrenze isch erreicht. Zwar no nid im Ziel, das mues mä sich zersch no erkämpfe. Via Dütschem Bode geits verwinklet u ire grosse Schloufe no dür X Industrie- u Wohnquartier am Ziu entgege. Das erreiche ig de ou überglücklich u mit äre Portion Stolz. Trinke mis verdiente „Fürabe“ Bier. Luege mis Resultat a, u troue mine Auge nid. Gesamtzyt 15h17min für die 393km. „eigentlich wäres ja 386Km“

Grechnet ha ig mit ca.17h Gesamtzyt. Sehr sehr sehr zfriede u glücklech la ig mi no uf dr Bühni bim Obligate Interview lah fire.  No äs guets Stück Fleisch vom Grill äs chüels Bier derzue. Nach zwöi 150er Kaffee geits is Hotel zrugg u unger ä wohltueendi Duschi…

Glich hie no äs paar Date:

  • Gesamtdistanz:393Km
  • Gesamtzeit: 15h17min
  • Gesamt Durchschnitt:  25,77Kmh
  • Zeit in Fahrt:   14.10h
  • Durchschnitt In Fahrt: 27.7km/h
  • Max Geschwindigkeit 77Kmh
  • Hm: 3860
  • Trittfrequenz Durchschnitt: 75
  • Trittfrequenz Max: 108
  • Puls Durchschnitt: 150
  • Puls Max: 181
  • Temperatur Durchschnitt: 21Grad
  • Temperatur Max: 34Grad
  • Temperatur Min: 13Grad

(c)alphafoto.com

(c)alphafoto.com